Ssp. II 48

§ 1. Haftung des Hirten. § 2. Wenn jemand Korn zu lange auf dem Felde lässt. § 3. Wenn jemand den Zehnten zu lange auf dem Felde lässt. § 4-12. Wo, wovon, wann und wie wird gezehntet.

§ 1. Svat die hirde binnen siner hude verluset, dat sal he gelden.

§ 2. Let en man sin korn ute stan, als alle lüde ir korn inne hebbet, wert it ime gevret oder getret, man ne giltes ime nicht.

§ 3. Dat selve dut man umme tegeden, of ine die tegedere nicht nemen ne wel, of in de man de ine geven sal uppe deme velde let stan, unde den sinen buren bewiset.

§ 4. Iewelk ve sven it sin junge gewint, svar it des avendes to herbergen kumt, dar sal man't vortegeden. Die sat vertegedet man uppe'n velde, dat ve in'me dorpe in iewelkes mannes huse, dar dat ve geworpen wirt.

§ 5. Iewelkes veis gift man den tegeden sunder hunre. Iewelken hof unde wurd unde sunderlik hus vertegedet man mit eneme hune in sente mertens dage.

§ 6. Svar man rechten tegeden uppe'n velde gift, dar sal man geven dat tegede schock, gelike gut den anderen, oder die tegeden garven.

§ 7. Svenne en man sin korn invoren wel, dat sal he kündegen deme tegedere, of he in deme dorpe oder uppe'n velde is. Ne wardet he denne sines tegeden nicht, die man vertegede ime selven, als he sinen eid dar an beware, of man in van ime hebben wel, unde bewise'ne twen sinen geburen, unde late'ne ute stan; so sal he's bliven ane schaden, of he seder geergeret wert oder verloren.

§ 8. Man gift ok maneger wegene bescedene schok to tegeden von der hove, unde en lam von der scape hirde die in enen hof gat.

§ 9. Svar men korn tegeden gift, dar sal dat seil, dar die garve mede gebunden is, wesen ener dum elne lang tvischen den twen knotten, swan dat seil gerecket is in winter korne. -

§ 10. Sve den tegeden na rechter gewonheit gift, die hevet ene wol gegeven.

§ 11. Von benen aver unde von allerhande ve nimt die tegedere sinen tegeden, of he's beden wel von jare to jare, bit he ime gebore von deme huse, dar man ine von gelden sal. Ne wel he's aver nicht beden, so sal man ime geven, dat ime jarlikes gebort.

§ 12. Von iewelkeme volne unde mule gift man enen penning. Von me kalve unde esele unde schape unde verkene enen halven penning, of ir is vive oder dar beneden; is ir aver sesse oder dar boven, so nimt ir die tegeder en to losene, dat seste mit tven penningen, dat sevede mit anderhalveme, dat achtede mit enem penninge, dat negende mit enem halven. Jene aver des dat ve is sal to voren tvei utnemen under sessen, unde drie under negenen, er die tegedere kiese. To dirre selven wies vertegedet man die gense unde die czegen to hellingen.