Ssp. II 12

§ 1-3. Persönliche Erfordernisse zum Urtheil-Finden und Schelten. § 4-15. Verfahren beim Fragen, Finden, Widersprechen, Schelten des Urtheils.

§ 1. Ordel ne mut en man ok nicht vinden over sinen herren, unde over sinen man, unde over sine mage, dar't in an ir lief, oder an ir gesunt, oder an ir ere ga.

§ 2. Scepenbare lüde muten wol ordel vinden over iewelken man. It ne mut aver uppe se neman ordel vinden, dat an ir lief, oder an ir ere, oder an ir erve ga, noch ordel scelden, he ne si in evenburdich.

§ 3. Buten koninges banne mut iewelk man over den anderen ordel wol vinden unde ordel scleden, die vulkomen is an sime rechte, um also gedan sake, die man ane koninges ban richten mach.

§ 4. Schilt man en ordel, des sal man tien an den hogesten richtere, unde to lest vor den koning; dar sal die richtere sine boden to geven, die dar horen, welk ire vulkome vor deme koninge. Die boden solen wesen scepenbare vri, of it in ener grafscap geschiet. Geschiet it aver in ener marke, so mogen't wesen allerhande lüde, sve si sin, deste sie vulkomen sin an irme rechte. Die sal die richtere bekostegen; brot unde bier sal he en genuch geven, unde drü gerichte to dem etene die des dages tidich sin, unde enen beker vul wines; tvei gerichte sal man den knechten geven. Vif garve iewelkem perde under dage unde under nacht, unde sal se vore beslan. Sesse solen der knechte wesen, unde achte der perde. - Svenne se den koning erst ereschet binnen sessischer art, so solen se to hove varen, unde dar na over ses weken dat ordel weder bringen.

§ 5. Die dat ordel schilt, ne vulkumt he's nicht, he mut dar umme gewedden deme richtere, unde jeneme sine bute geven, des ordel he besculden hevet, unde deme richtere sine kost gleden, die he mit den boden verdan hevet.

§ 6. Nenes gesculdenen ordeles mut man tien ut ener grafscap in ene marke, al hebbe die greve de grafscap von dem markgreven. Dit is dar umme, dat in der marke nein koninges ban n'is, unde ire recht tveit; dar umme sal man is vor dat rike tien.

§ 7. Sve ordeles gevraget wirt unde des nicht vinden ne kan, darn he dar sin recht to dun, dat he's nicht vinden ne kunne, so mut man's wol enen anderen vragen, dar na den dridden unde den vierden; die leste gewint is dach also lange, als jeneme gedegedinget is, uppe den dat ordel gat.

§ 8. Schilt en sasse en ordel, unde tiüt he's an sine vorderen hant unde an die meren menie, he mut dar umme vechten selve sevede siner genoten wider andere sevene; svar die mere menie segevichtet, die behalt dat ordel. Iewelk verseget man geweddet deme richtere, unde gift deme bute, die up ine gevuchten hevet. Um ordel ne mut man niergen vechten denne vor deme rike.

§ 9. Vreget man enen man ordeles, unde vint he't na sinem sinne, so he't rechtest wet, al si it wol unrecht, he ne lidet dar nene not umme.

§ 10. Wedersprict en die vulbort unde vint he en ander ordel, svelker die merren volge hevet, die behalt sin ordel, unde blivet is beide sunder gewedde, wende ir nen des anderen ordel besculden ne hevet.

§ 11. Sve so en ordel beschilt, die sprict alsüs: dat ordel dat die man fevunden hevet, dat is unrecht, dat scelde ik unde tie des, dar ik is to rechte tien sal, unde bidde dar umme enes ordeles, war ik is durch recht tien sole.

§ 12. Schilt en svave enes sassen ordel oder en sasse jenes, dat muten sie vor me koninge besceden, alse hir vore geredet is.

§ 13. Stande sal man ordel scelden. Sittene sal man ordele vinden under koninges banne, manlik up sime stule. Die aver to den beken nicht geboren is, de sal des stules bidden mit ordelen, en ander ordel to vindene. So sal ime jene den stul rumen, die't irste ordel vant.

§ 14. Svelk ordel jene denne vint, dat biede he to haldene mit sime rechte, unde tie des dar he's durch recht tien sole, unde bidde dar der boden to. Um en gesculden ordel ne sal man nener vulbort vragen. De't ok gevunden hevet, de ne mut dar nicht af laten ane jenes willen, deme dat ordel gevunden is to sinem vromen.

§ 15. Wirt en man gevangen um ungerichte unde vor gerichte gebracht, he ne mut nen ordel scelden, noch die man die vechten sal, sint he binnen den warf kumt.