Ssp. I 8

§ 1. Gerichtszeugniss über Eigen, Recht, Leib und Leben. § 2. Vom Frohnboten. § 3. Zeugniss über Sühne und Urfehde.

§ 1. Svar man aver egen gift oder sat, oder enem manne tügen wil an sin recht, oder an sin lif, oder an sin gesunt, dat de man vor gerichte verlovet hebbe, oder ime verdelt si; des mut di richter selve sevede sogedaner lüde de eme ordel vinden getüch sin.

§ 2. Des vronen boden getüch stat vor tvene man, of man's bedarf, dar man mit seven mannen getügen sal. Sin bute die is ok tvevalt, unde sin weregelt na siner bort, sint der tiet dat he to vronenboden gekoren wirt.

§ 3. Sune aver unde orveide, de de man vor gerichte dut, getüget men mit deme richtere unde mit tven mannen. Geschit it aver ane gerichte, he mut it getügen selve sevede, dem man die sune oder de orveide dede.