Seite davor
Gliederungsübersicht
Seitenauswahl

AugsbStR. Art. 54

Swaer dem andern miscet einen hurrensun, der ist dem vogte ainez phundes darumbe schuldik. Schiltet aber er in von der cristenheit, daz ist ob er in heizzet einen zohensun oder merhensun, mussensun, ketzer, meineide oder einen diup oder einen viertaeter oder einen rauber oder einen boesenwiht oder anderiu schaeltwort diu den man von sinen eren sagent, der sol dem clager bezzern als er stat an im vindet, unde dem vogte eins phundes. Wolte aber der clager niht redelicher bezzerunge, so sol ez danne an den ratgaeben sten die danne des klainen rates sint.Nachtr. Swa aber ein man eins biderben mannes wibe eine hurren mizzet oder ains biderben mannes nifteln oder siner besliezzerin oder sust einem biderben frewelin, der ist dem vogte schuldik funf schillinge unde sol dem clager bezzern unde buzzen nah der ratgeben rate die danne des clainen rates sint. [Schreiberhand: II.]

Swelhem man di ratgeben von der stat ain gaescheffte enphelhent, ez si groz oder chlain, davon er ir phleger haizzet, swer dem vebel mit ret daz im an sin ere gat unverschuldigot und unverdinet, der sol den ratgeben und auch dem phlegere, swer er ist, ze bezrunge dri manod auz der stat sin.

Swem aver die ratgeben under den vierundzwaintzchen ein geschaeffte enphelhent davon er ir phleger ist, oder sust einem man der der stat sunderlich gesworn hat - swer dem uebel ret unverdinet oder iht anders tut daz im an siniu ewerk gat, swan daz ze chlage chumt, wolt der des lougen den man ez zihet, da sol man sin lougen niht umbe nemen, ob dirre gesagen mak und einer mit im ouz den vierundzwainchen ouf den eit den si der stat gesworn habent, daz er im uebel geret habe oder getan habe daz im an siniu ewerk gange ane schulde, und swan si daz gesagt habent als davor beschaiden ist, so sol dirre ze bezrunge ein iar ouz der stat sin der ez da getan hat. [Schreiberhand: III.]


Seitenauswahl
Gliederungsübersicht
Seite danach